三個BB大比拼

本甘好開心! (應該係媽咪開心D至真) 因為有兩個BB同我差不多時間出世! 佢地就係彥楠 (圖中最左邊, 五月廿五日出世) , 同埋昊霖 (圖中間, 五月廿九日出世) . 真係橋嘞, 我出世後4日一個, 再4日又一個...哈哈哈...三個BB來說, 本甘最奀, 彥楠最朱古力, 昊霖最重磅; 本甘懶瞓豬, 彥楠大食, 昊霖鍾意傻笑. 呢張相係我們三個第一次見面係昊霖屋企影的.
佢地媽咪都係我媽咪的中學同學, 所以媽咪好開心, 可以同佢兩個friends傾湊仔經.由大肚個陣開始, 已經好多計傾. 記得三個媽咪一齊大住肚去Joanne Auntie的婚禮嗎? (仲有Janita Auntie添啊!) 不過最緊要都係BB出世之後, 大家可以講下update, 例如BB食多少奶奶, 打針後有無發燒, 成長過程的轉變...等, 什麼也可以交流.
媽咪話: 今年係babyboom, weekend 出街, 週街都係BB, 小孩或大肚婆. 唔知係米因為沙士過後, 雞年過左, 大家開始生BB呢? Daddy成日話, 本甘面對的競爭非常大. 要策略性留班先得啦! 唔係嘩? 可唔可以策略性跳班啊?

第一次打針針(兩個月大)

本甘搬去大圍後, 我們就告別將軍澳寶寧路健康院, 移師去瀝源健康院. 第一次去呢間健康院, 就要打針針啦!

初扺步, 覺得舊左少少, 人不算太多, 等了不久就去磅重同度高, 4.55kg, 身長55cm, (本甘身長第一次度唔合格, 得54cm, 要度多一次, 本甘拉長D對腳, 先至夠55cm剛剛合格). 之後就入去見姑娘. 呢個姑娘口花花, 讚完本甘靚仔, 又話佢似Daddy, 攪到Daddy鬼咁開心, 好彩, 佢都有讚媽咪湊本甘湊得好, hahaha...

同姑娘吹完水, 就去打針針, "Ah", 姑娘見佢開大口, 即刻比小兒麻痺劑佢食, 本甘喊左兩聲就無喊了. (但係媽咪都係驚到唔敢入去打針房, 呢D都係Daddy後來話翻比媽咪知.)

打完針針返屋企, 犀利羅! 下午三點多開始, 本甘就喊得好厲害, 又唔多肯食奶. 你知啦, 本甘平時都唔多喊, 佢喊起上來, 都得人驚架! 嘩, 每次佢食奶奶前, 又要量體温, 又要灌佢飲panedol水水, 最高燒到38.1度架.

好彩! 第二日下午開始就無事了. Patrick uncle來探我們. 睇下, 呢副相就係本甘發完燒之後影, 仲識笑添!



媽咪後話: 今次去健康院, 好似去攞成績表咁樣, 身高, 體重, 頭圍, 樣樣都有標準; BB食多少奶奶, 去多少次大便, 都好緊張. 好彩今次樣樣都達標, 我們都好開心. 不過, 明知道BB發燒係打針的正常反應, 都會好擔心, 始終BB都唔識得講佢有什麼唔舒服, 都要靠估羅!